بقلم /الشاعر محمود جوده
أنا تلميذ في الابتدائيه
مشكلتي ياناس صعبه شويه
شايف الهم في عيون ابويا
وأُمي اللي ادتني الحنيه
ابويا سمعته بيقول لامي
انا والله خلاص فاض بيا
هو انا كان ناقصني هموم
مصاريف الكتب الدراسيه
لبس مدارس أسعار نار
غير الدروس الخصوصيه
اللي علينا ياناس فرضوها
من غير رحمه شويه شويه
رجع التعليم تاني للباشوات
ونصيب الفقرا الأٌميــــــــه
نزلت دمعتي من عينــــــي
وبحرقه حضنت أمي وأبويا
وقولتله متخافشي عليـــــــــا
أنا هنزل من بدري أساعدك
لجل اخواتي يدخـــــلوا كليه
وأضحي بتعليمي وبحلمي
أني أكون صاحب حيثيه
نزلت قوام دمعـــــــة ابويا
وقاللي ربي يخليـــــــك ليا
حضنتني امي بكل حنانها
وقالتلي يا ضي عينـــــــيا
كفايه احساسك بينا
ياضنايا ربك عـــــالم بينا
هيدبرنا ويقوينا
علي المعيشه القاسيه د يه
دخلت فصلي وانا مكسوف
مصاريف كتبي مش في ايديا
اقدر اساوي ازاي زملائي
ومحدش يتمهزق بيا
حسيت ساعتها ان انا مكسور
وقلب ابويا علينا مقهور
انا واخواتي الخمسه كتير
وهمومنا شايلها بالدور
بصلي استاذ وسط الفصل
لما لمح دمعتي في عنيا
اخدني في حضنه وهداني
وتاني يوم نادي عليا
في وسط طابور الصبحيه
لقيته وقف ومعاه صندوق
مكتوب عليه عباره ذكيه
خاص بالعنايه الإلهيه
اللي معاه مبلغ زايد
عن مصاريفه اليوميه
بسرعه يسقطه في الصندوق
ونضيف له درجات اضافيه
واخر اليوم كان الصندوق
مليان بعملات نقديه
اخدها الاستاذ علي المدير
و في طابور الصبحيه
جاني الاستاذ وفي ايده
كشوفات التلاميذ المعنيه
اللي مدفعوش مصاريفهم
وجه دوراسمي ونادي عليا
وبضحكه جميله لقيته اداني
كل الكتب الدراسيه
وقاللي دا حقك مش صدقه
لان اصولك مصريه
واخدني في حضنه وسمعني
وانا بدعي ودموعي في عينيه
بقول ياريت كل اللي فوق
يبصوا علي تحت شويه
امضاء
تلميذ في الابتدائيه
