{حكايات}….

إبراهيم منصور بدر
………………..
.{1}
وتسألنى ..
الرموش أوقات،،
مبين قلبك وبينك إيه؟..
وكل إجابة وإجابة..
تقول قلب..
اتفطم عالحلم..
تقول..
جوّه الحياة غنوة..
ف صورة بريئة لعنيها!..
تقول..
الجد والجدّة،،
سقونى الحب والرحمة..
تقول ..
تفضل..
تقول،،
وتقول،،
ولسّة..
بتصحي ف الوحدة!.
……………………………..
..{2}
وسألت العين..
عن معنى روحين..
خايفين من بعض،،
ومابينهم..
عمر من النظرات،،
وكلام قلبين..
مش لاقى سطور؟..
أفكار بتدور،،
وتخاف م النور،،
وف حضن الضّلمة
تقول حكايات!..
من أوّل فين..
بدئت ياسنين،،
وازاي اتشاركت ..
ف النهايات؟.
…………………….
…{3}
وتتكلِّم..
تهز البسمة ،،
والدمعة!.
ينوَّر فيّه..
نور يرسم..
خطوط القلب..
عالسماوات!،،
كأنى ف أوّل الدنيا،،
وآخر فرصة للغفران..
بحبِك أد كل النوّر..
حضنت البسمه ،،
والدمعة،،
وساعات الحلم..
ودوبت بكل مقاديرى..
ف نظرة..
فيها عطف ،،
واسم..
حروفه ..
مالية كونى عطور!.
……………………….
….{4}
كفاية..
البسمة بتنوّر..
عيون القلب..
كفاية..
لحظة مع طيفك..
ف ليل البُعد،،
وفكرة..
إنّى متحيّر،،
ومتردِّد،،
ومتغيَّر..
دى لهفة قلب!،،
وخوفى..
من كلام يفرق..
على أد السما والأرض!.
أنا ف حضن الحياة ..
واحد..
بيكتب بالغُنى حكايات،،
وبين فكرة..
حياة ،وممات..
بيتبسم ف قُرب وبُعد!.