النفاق زايد قوي
بقلم/ محمد عنانى….
والنفاق زاد بالقوى
بيجيده نصاب فهلوي
بالبيضه يلعب والحجر
لاهو طبيعي ولا سوي
لكنه شاطر في الكلام
دايما عليه تلقا الزحام
وللقيم تلقاه هجر
شيطانه ماسك للجام
فين مايمشي يكون وراه
مادام هواه ناسب هواه
ولو بمين حتى غدر
حلم الوصول هدفه ومناه
لو حتى على غيره يدوس
دا كل شئ عنده الفلوس
ويلاقي زيه من البشر
ضعاف ضماير والنفوس
دول موجودين بينا كتير
بدون حيا وبدون ضمير
بعجيب زمان فيه العبر
منه بنصرخ نستجير
