كتبت سالي الصعيدي
الجواز منظومة إجتماعية مفهومها خاطئ جداً للأسف … إحنا فاهمين الجواز غلط أو بالأصح فهمونا الجواز بطريقة غلط
فهمونا إن الست لازم تستحمل مهما حصل لإن الست مالهاش غير جوزها وبيتها وعيالها وكأنها يوم مامضت على عقد الجواز مضت على عقد إستعبادها
علشان كده يوم ماتفكري تتجوزي أتجوزي راجل وأبعدي عن أشباه الرجال إللى مفاهيمهم مغلوطة فى كل شئ مش الجواز بس أتجوزي راجل فاهم يعني إيه بيت وجواز مش راجل شايف إن مسؤليته الوحيدة إنه يجيب فلوس للبيت أتجوزي راجل تقدري تتناقشي معاه أتجوزي راجل وقت ماتحتاجيه تلاقيه مش وقت الجد تلاقيه مع أصحابه مش معاكي أنتِ
اتجوزي راجل تقدري تتحامي فيه يطمنك ويعيش حاميكي ترمي همك فوق كتافه.. إتجوزي اللي ميقدرش يتخلي عنك في وقت احتياجك ليه.. اتجوزي اللي يحارب الظروف عشانك.. اتجوزي اللي يبيع الكون عشانك ويكون أب لأولادك اتجوزي اللي يحب عيوبك قبل مميزاتك.. اتجوزي الراجل اللي يسندك لما تقعي ماتكونيش أنتي أرجل منه وأجدع منه .. اتجوزي الراجل الحنين اللي يعرف يحبك بجد ”
أتجوزي راجل لإن أشباه الرجال كتروا وإللي يقول غير كده يبقى ضد المنطق
