(بازل).

إبراهيم منصور بدر….
……………………….

( 1)..
أنا كويس،،
وحالى ،،
كإنُّه متغمّس ..
ف شربة ملح!.
أنا والجرح من كله ..
مفيش غيرى..
اتجرح جسمه مع ضله !..
حواليا..
نجوم بتدور..
مش شايف،،
وﻻ نور ،،
وﻻ ضلمه …
انا بين ارضين..
ف فضاء الله!.
متهزتش وﻻ اتزلزلت..
أنا اتفرتكت،،
وطيرت حتت،،
واتقابلت أجزائى رجعت!.
…………………………………………………..
( 2 )..
مبتشوفنيش،،
وانا شطانى..
ركب عقلى،،
ونسيت قلبى..
تقدر ..
مش هتقدر؟..
ﻷ هتقدر..
تفرق ايه ديمابتخسر!..
هدّى بقى..
إصرخ ..
ف كل الصور..
لعنة هواك هتموتك هتموتك!.
متقولهاش..
لأقولها..
خليتنى..
مجذوب للهوان..
ساجد على حضن الهوى..
ف خيالى طيفها..
كأنها معايا بكيانها ..
بلمس خدودها ..
بضهر كفى..
تتسبِّل العين ..
عطرها..
ينساب ف عطرى،،
وشهدها يدخل..
لجوفى يحلّى مُر اﻹنتظار..
شكلى خلاص مبقتش افتكره
لون عينى..
تسريحة شعرى..
منظر جسمى..
حتى نسيت إسمى!.
……………………………………………….
( 3 )..
فاكر أوى..
لمسة ونظرة..
كانوا أصدق حاجه فيها!..
رسمت عمرك..
بابتسامه،،
وغبت عن ارضك سماك،،
وبقيت ف عالم ..
من سحاب بخر الدموع..
مهزوز..
خلاياك بتنتفض..
قلبك رافض يدق ..
صدرك مطبوق ونفسك ..
طالع مش راضى يدخل..
موت بقى وريحنى منك..
أنت لعنه الحرق فيها حلال..
ذنبك إيه ف إنسان مقطع ؟..
سلمت جدا..
هنت جدا..
كان نفسي نسكن بعض!.
……………………………………………………………
( 4 )..
على أول الشارع..
جمب عمود النور الوالع ..
ساند ضهره على اﻷسلاك..
شايف،،
ومش سامع!..
واقف،،
ومش مستنى حد..
مستنى تشتى ..
عشان يكهرب جتته!.
مش قادر اتحول لشر،
وﻻ قادر ابعد شئ يشل..
عشت ليه؟..
مش مجبر الفرض..
اللى بدلته لصلاة..
كان اختيارك بارتياح..
مستجير ..
من سعير ،،
وحده وعشم ..
عشّمت بيه تكوينك!..
صدقته بينك ،،
ومكانش ليك..
انك تصدق بيه..
قلت مش معقول هتقدر..
قلت يمكن..
بس بتشوف..
أد إيه جوالك شغف..
ﻻﻻﻻ مش زى حد،
وﻻ حد فيهم يشبه
الحد اللى سبقه،،
والحب ده غير أى حب..
أنا كويس..
أنا مهيس ..
انا تراﻻلى ياحالولى..
بازل ناقص كتير تفاصيل!.