أهو ده اللى صار

( أهو ده اللى صار )

سمر اسماعيل

لسه فاكره ضحكته.  

ع حاجة حلوة.  

بعفوية بعملها ..  

لسه فاكره ذكرياتنا.  

بكل تفاصيلها ..   

فاكره لما قولتله.  

مش هعرف أجى. 

المرة الجاية !!   

ووشوشنى بعد 

م ضحك ف عنيه

وقالى هتيجى !!

فاكره أحساسه

برعشة البرد ف أيدى !!

فاكره ( بحبك ) اللى عشت

أحلم يكتبها بدمه ف وريدى ..

فاكرة لما كنت بشوف

ف فرحته عيدى ..

الچاكت الأسود ..

البلوفر البيچ ..

والقميص الروز ..

لما أطلب منه

حاجة و يشاورلى

م عيونه الجوز !!

ضحكتى المتدارية لما 

بيزعل ، بيتقمص ع حاجة

تافهة ويضرب بوز !!

حاجات كتير أجلتها

جوايا لحد لما يعوز !!

فاكره هزارنا وكلامنا

ع الأفلام الأجنبى ..

فاكره رقة وروده قدام

حيائى وخجلى بتنحنى ..

الحنان والغرام والشوق

جماله وهو متعكر !!

وجماله أكتر لما يروق !!

نظرة عيونه الغرقنين بتحكى

أنه شايف ف عيونى الطوق !!

فاكره عتمه شمسى قدامه !!

فاكره كونه شروق ..

النضارة ، الدوجلس والساعة

كل تفصيله مهما كانت صغيرة

متعلقة جوايا ع شماعة !!

كونى دايما صغيرة قدامه

ولا حاجة .. وهو كل حاجة ..

كونى ببقى مزهزة ومنورة

علشان هو هيشوفنى ..

كونى لسه لحد الآن مش فاهمة

هو أزاى كدة بيكون عايشنى ؟!!!

فاكره أنى وياه دايما

كنت أقوى ، كنت أغلى ..

كل حاجة وأى حاجة ..

كانت بوجوده حلوة ..

فاكره أن عمر مكان لنا ولا

هيكون لنا ف بعض شهوة !!

الأكيد أنه سمى

بعدى عنه قسوة !!

بس مكنش ينفع

يتخيل أنى هنسى ..

عارفة أن المؤمن

مبتحرقهوش النار

ومهما طال ليلنا

أكيد هيكونله نهار

غصب عنى وغصب عنه

أهو ده اللى صار ?

                                      #سمر_إسماعيل

                                           #عشق_لا_ينتهى