بقلمي.. سحر ابوالعلا
مشفتنيش ابدا حبيب
و مشفتكيش غير
وطن و أهل وبيت
ارضي اللي فيها
غرست قلبي و بذرته
و بدموع عنيا رويت زرعتي
فنبتت روحي اللي بيها حييت
شفتك لقا وقت البرد يطرح دفا
شفتك قلب فى قلب البعد طبعه الوفا
شفتك طريق مليان أمان
طوق النجاة لقلبي الغرقان
شفتك بنتي من جوة قلبي بتنولد
شفتك امي اللي ع اديها بتوهبني الحياة
شفتك حلمي اللي محلمتوش
طريقي اللي لسة ممشتهوش
شفتك أميرة قلبي و طفلتي
شفتك سندي و رفيقتي و بوصلتي
شفتيني ايه؟
مجرد واحد عرفتيه
عدى فى طريقك قال سلام
سلامه عادي ردتيه
لا ساب علامة جوة عقلك
و لا حتى اتعلق قلبك بيه
شفتيه مرة مكلمتهوش
او يمكن مرة كلمتيه
بس من غير متقصدي
زرعتي حبك فيه
و لما جالك يسألك
شايفاني ايه؟
تقوليله صاحب او صديق
و الله قلبي عمره ما شافك
غير حبيبته
و حق قلبي عمري ما افرط فيه.
شايف جوه عنيك كلام
غير الكلام اللي قولتيه
يمكن شوية خجل
و حب كتير خايفة تبوحي بيه
بصي فى عنيا اطمني
و وعد منّى و وعدي دين
هكون ليك طريق امان
يحميك لو غدر الزمان.
