الكبدة الإسكندراني من غير بصل
كتبت: شيف إيمان سنيوريتا
بما أني إسكندرانية ماينفعش حد يسأل على الكبدة الإسكندراني وسنيوريتا ماتردش عليه.
مبدئياً لازم نكون متفقين وبدون أي جدال إن الكبدة الإسكندراني ملهاش علاقة بالبصل نهائي ولا طماطم ولا خضرة ولا كل الكلام ده عشان منزعلش من بعضنا الكبدة الإسكندراني ثوم، فلفل كتير والأفضل يكون حامي مولع بس فقط لا غير.
ولازم الكبده تكون مستوردة ولها تقطيعة معينة إسمها عصافيري بتكون شرايح الكبده رفيعة جداً ومقطعة بالطول رفيع، وأهم شئ الكبده لا تُغسل لأنها لو اتغسلت بتزرنخ وتتزفر وريحتها في الأكل صعب جدآ، أضيع زفارتها إزاي أول ما اجيبها بحطها في مصفاة وأعصر عليها نص ليمونة هتقطم دمها ولونها هيفتح ومش ح يكون فيه رائحة زفارة نهائي بلاش خل الخل حيهري الكبده ويثبت زفارتها، أو نص كوباية لبن وانقع فيها الكبده ساعه ساعتين براحتك حسب وقتك واصفيها واستخدمها علطول مشطفهاش.
آخر حاجة الزيت لازم تتوصي بيه شويه يعني حبه حلوين كده عشان تخدي شوية كبدة ملهمش حل.
خلاص كده ياللابينا نسمي الله ونقول طريقتنا ومقاديرنا
نصف كيلو كبدة مستوردة
٧ فصوص ثوم مفرومين ناعم جدا
فلفل بارد علي حامي واتوصي وكتري بقا حلاوة الكبده فلفل كتير + كوب زيت نباتي + نص معلقه صغيره من كمون, كزبرة، شطة، وملح + ٥ معالق كبار خل.
الطريقة:
قبل ماأبدأ أي حاجه هجيب بولة وهنزل بالتوم والتوابل كلها عليه والخل وأقلبهم كويس جداً وهاخد معلقه كبيره مليانه وأقلبها علي الكبدة وطبعاً مسيبهاش كتير عشان الخل ميهريش الكبده يادوب قبل مانزلها في الزيت واركن باقي خليط التوم علي جنب
في طاسه واسعة ومفرودة مستوي واحد عشان الكبدة تاخد سوا واحد ومظبوط هنزل بالزيت واسخنه كويس جدآ وهنزل بالفلفل تشويحة والزيت ياخد ريحة الفلفل هنزل بخليط التوم تشويحع برضوا هنزل بالكبده وأقلب وكل ده علي نار عالية متوطيش من البدايه للنهاية عشان الكبده متجبيش ميه تلون الكبدة وتاخد لون واحد بطفي عليها وخلصت معانا متغيبهاش عالنار هتجلد وتشد معاكي مع عيش فينو بقا تحطي تحت جرجير وبعدين الكبدة وآخر حاجه رشة ملح خفيفة علي وش الكبدة وهي في قلب الرغيف وكلي ودوقي أحلا كبده اسكندراني علي أصولها
تعديل
الناس إللي بتقول مستورده لأ والبلدي أحلا
ياجماعه ديه براحتكوا أنا بقول الطريقه بتاعت الشارع والمطاعم مبيستخدموش غير المستوردة ومش كل الناس عندها امكانية تستخدم البلدي ركزوا في الطريقه والنوع براحتك، أكيد البلدي لا يعلي عليه.
