5 فانتازيااااا للكاتبه نهله الديب
#زيي_أنا
……. نهله الديب
حياتي ليه مبهدله
دخلتها ناس مِشكِّله
الطيبين والمخلصين
وناس كتير كات معرفتها
مقندله
والدنيا دايرة مقفِّلَه
أوقات تلاقي الخِسه في كل اتجاه
أوقات تشوف الجدعنه
حتى أنا ..
ساعات بكون مكسوره زي لوح ازاز
حدفوه بطوب
وساعات أكون متفرعنه
أهي دي أنا
كتير حاولت أعيش لوحدي
لكن فشلت
أصل الحياة محتاجة ناس
تحس بينا تحبنا
وأكيد ف وسط الناس دي
.. حَبَّه غاويين عكننة
رغم الوضاعة والأنا
مستورة مع اللي جوا قلبه .. ربنا
ولو وقع أو انكسر ..
هيقوم يقف .. زي الجبل
ثابت وشامخ للسما
ولو هموم الكون على ضهره اترمت
ولو ف يوم ضهره انحنى ..
هيكون سجوده لربنا ..
ابن الأصول زي الذهب ..
قيمته لايمكن يوم تقل ..
جواه نضيف ..
ومفيش مكان جواه لغِل
واضح كما نور الصباح
دايما عيونه للسما
تمام كده .. زيي أنا ..
.. آه وربنا ..
نهلة_الديب
