يوم من ذهب.. عيد ميلاد الفرعون المصري “محمد صلاح”
“كتبت /صفاء مصطفى ….
كاتب السيناريو فى معين كان اقصى خياله انه يعمل قصة لاعب المصري احترف في فالنسيا وصعد بمصر لكأس العالم وكنا وقتها شايفين السيناريو مبالغ فيه وبنهرب بيه من واقع محترفينا. واحنا صغيرين لما كنا نسرح بخيالنا واحنا بنلعب بلاي ستيشن كنا بنعمل لاعب مصري ونخليه يلعب في اندية كبيرة اوروبيا ونتخيل انه بيحقق الانتصارات كنوع من الحلم . تحارب لاعبينا في اوروبا كلها بالقلم الرصاص أو زي آلاف التجارب للاعبين عاديين التاريخ مش فاكرهم ولا هيقف عندهم في يوم
حتى جه صلاح من العدم حرفيًا . جه كاستثناء لواقعنا وبدل الدراما والأحلام لحقيقة عدت حدود الخيال ، لدرجة اننا يمكن للحظات لسه مش مصدقين اللي صلاح بيعمله وان ابن نجريج مركز بسيون بقى حديث العالم كله وبقى بيذكر كواحد من أفضل اللاعبين في العالم. وإن لاعب مصري قاد فريقه ليفربول لتحقيق البرميرليج بعد غياب ٣٠ سنة وقادهم لتحقيق دوري ابطال اوروبا والسوبر الأوروبي وكأس العالم للأندية وانه اخد احسن لاعب في البرميرليج واحسن لاعب في افريقيا مرتين واخد هداف البرميرليج وانه اول لاعب يسجل في ٦ دربيات متتالية في انجلترا وانه الهداف التاريخي لديربي اليونايتد والليفر و الهداف التاريخي لليفربول في الدوري الأقوى في العالم الدوري الإنجليزي
لو ده قبل صلاح كان اتكتب فيلم كنا ضحكنا كلنا واتريقنا على كاتب الفيلم وعلى المبالغة وان اخرنا نحقق ده في الافلام. بس صلاح عمل معجزة حتى خارج حدود احلامنا صلاح كسر كل المستحيلات وعدى كل الموانع والحواجز اللي بتقول ان ده مكنش ممكن . صلاح حدوتة فصولها اغرب من الخيال وحروفها اتكتبت بالذهب عشان نقول في يوم خرجت من مصر معجزة أسمها ” محمد صلاح “. كل سنة وانت طيب يا فخر مصر 🇪🇬
