يا ريس انت فين يا ريس من ندائتنا ؟!!الشعب يستغيث بفخامة الرئيس
كتب ابراهيم مداح
ياريس نفسنا تسمع صوتنا
مافيش حد غيرك ينقذنا من اللي احنا فيه
عشمنا في ربنا وفيك يا ريس
اللى بيحصل لنا دا والله مهزلة بكل المقاييس ؟!!!
لما المواطن العادي مش عارف يشترى خضار بيته ويعجز أنه يأكل أولاده
كده يبقي وصلنا لطريق مسدود ومش عارفين نعمل ايه
احنا المواطن البسيط الغلبان اللي عايش علي دراعه وبيسعي علي رزق اليوم بيومه نعمل ايه
لا بنتكلم عن فراخ ولا لحمه ولا سمك بقينا نتفرج عليهم وناخد صورة جنبهم واستغنينا عنهم خلاص
احنا بنتكلم علي القوت اليوم اللي يشبع البطون فقط
طبق السلطة النهاردة بيتكلف ٥٠ جنيه اسعار متغالى فيها حد الجشع ومفيش اى تحرك من الدولة بقالنا سنين بنتكلم وكل يوم بنتكلم ومع كلامنا بنلاقى كل يوم صدمة جديدة ارتفاع مخيف في الأسعار
كاد أن يؤدى لمجاعة الناس الغلابة مش لاقيه تاكل بجد
يعنى ايه طماطم الكيلو يوصل 20 جنيه هى فاكهه ؟!!
كنا بنشترى التلاتة كيلو بجنيه
يعني ايه الخيار ب 20 جنيه و الليمون كمان ب 20 البصل 30 جنيه اغلي من المانجو …
رغم أن مصر دولة زراعية وعندها فائض وبتصدر برة يعنى الشعب يموت من الجوع عشان الخضار والفاكهة تتصدر برة ومفيش عجز عندنا ولا جفاف
كيلو العنب وصل 30 جنيه كيلو البلح ب 50 جنيه ؟!!
قولتوا لنا الغالى ما تشتروه بطلنا بطلنا نشتري لحمة وفراخ وسمك
لكن نبطل نشتري خضاء ازاي و ناكل ايه
بقينا محرومين عاجزين نشترى طلبات بيتنا ؟!!
كيلو الرز ب 30 جنيه
والمكرونة ب 25 طيب أنه بيت في مصر ممكن يستغني عن كيلو الرز أو المكرونة في اليوم
زجاجة الزيت اللتر عدي سعرها ال 65 جنيه أنه بيت في مصر مش محتاج زجاجة الزيت كل كام يوم يحمر بطاطس ولا بزنجان
حتي البطاطس الكيلو 15 جنيه
احنا الغلابه ناكل ايه ونعيش ازاي ونفتح بيوتنا منين
فين حلولكم الحل نجوع نموت دى صرخة ربات البيوت العادية وانا ست بيت بعانى من الغلاء بتكوي بنار الاسعار كل يوم
فين تحرك الدولة عشان تحمى المواطن الغلبان من مطحنة الاسعار
محدش يقولى دا جشع التجار لان جميع منافذ الدولة والقوات المسلحة بتبيع بنفس الاسعار واكتر كمان
الدولة تمتلك مساحات واسعة من المزارع وتمتلك مشاريع انتاج كثيرة جدا يبقى اكيد الحل في يد الريس أنه ينقذ شعبه من الجوع …
عايزين حلول تساعدنا أننا نعيش ونفتح بيوت
حياتنا مش اكل وبس يا ريس
المواطن عليه عبء فواتير الكهربا والغاز والميه والمواصلات وبيوت مفتوحة وأطفال عايزة تعيش
في بيوت اتخربت بالطلاق بالأسباب دى ……
ولسه داخلين علي المدارس كمان الطفل الواحد دا ياكل ايه وهو رايح مدرسته …
.الطفل دة هيتصرف عليه اكل ولا مصاريف مدراس اللي أصبحت ارقام فلكية تفوق قدرة والي الأمر ولا دروس خصوصية ولا لبس ولا كتب
دة احنا مش عارفين نأكله نعمل ايه فيهم نجوعهم ولا نقولهم مفيش تعليم ولا نعمل ايه
عايزين حلول يا بلد عايزين حلول يا وزارء الرحمة حلوة ارحموا من فى الارض يرحمكم من فى السماء
أرواحنا في ايدك ياريس ومنتظرين منك الحلول السريعة اللي تنقذ فئة الغلابة من مجاعة حقيقة في البلد دي
صرخة نداء واستغاثة منقولة عن ربات بيوت عادية من البلد دي وكل أملهم أن يصل صوتهم للاب الرحيم فخامة الرئيس
كل املنا في الحياة أننا ناكل ونشرب ونعلم اولادنا ونقدر نعيش
منقول
