بقلم/محمد بركات
شايل ع الكتاف جبال
حمل ما تشيلو جمال
حمل تشيلو ماينشال
والصبر منى نفد
انحى الضهر اتهد الحيل
تعبان من كتر الشيل
موجوع وساكت كما الخيل
والبخت مايل بيا ميل
والقلب م الدنيا زهد
خلاص معدش احتمال
الكتف بالحمل مال
والحلم صعب المنال
ومالى فى الدنيا سند
لاجاه ولا من العيال
يشد حيلى ولد
انا المعلول بالاحمال
منين اجيبه المدد
واى كلام يتقال
مايوصف حالى ف البلد
حتى اللى منى
كمان ظالمنى
بدل مايشيلوا
الحمل عنى
كسروا ضهرى ماتفرد
ظلمونى الاحبه وناسى
وظلمهم ليا مانى ناسي
شربت المر فى كاسى
غنيت الحسره موال
بآهات من غير عدد
