مصر بلاد اللا معقوليات
كتب/ مهاب حسن
بما أنى إسكندراني وبحب إسكندرية.. قلت أتكلم عنها زمان ودلوقتي واسالكم هو اللي بيحصل ده معقول ولا مش معقول.
كانت إسكندرية زمان بلد العشق والحب والجمال.. كانت شوارعها نظيفة وواسعة وكان البحر واضح وجميل ولا الفلل والجناين والشجر كانت حاجة تفرح.. مش عارف ايه اللي حصل خلي الشوارع ضاقت والبحر اختفي والڤيلات اتهدت.
هو معقول تتبدل كل الڤيلات والبيوت القديمة الجميلة بتاعة زمان بابراج وناطجات سحاب تخفي وراها القبح وعدم الاهتمام وكانها علب وصناديق.
هو معقول كمية المباني على الشاطئ من كافيهات ومقاهي وشيش ورقص وطبل وحفلات.
هو معقول كل اشكال وأنواع العربيات الملاكي والكارو والحنطور الجميلة بتاعة زمان تبقي بكل الكم ده من السيارات الفارهه باشكالها العجيبة والغريبة والتكاتك والطيارين بعوادم العربيات وازدحام الطرق اللي لا تعطي فرصة للناس بالمشي على الأرصفة او حتى في الحواري او في نصف الطريق.
هو معقول نشوف كل المقاهي والكافتيريات في كل شبر من أرض إسكندرية على الأرصفة وجوة البيوت او حتى علي الشواطئ.. مش بس كدة ده في أماكن مكيفة وشيك جدا وبتسبب أمراض لا حصر لها وناهيك عن اللي بيدخن الشيشه تفاحة وكرازه وعلكة ونعناع وغيره وغيره كثير ولا كمان شيشة البوابين عشان رخيصة وبتخلص بسرعة وريحتها وحشة.
هو معقول تلاقي حجز الرصيف وتحت الرصيف وامام المحلات بحديدة ولا كرسي ولا برميل عشان الدكان ده أكل عيش ولا فيه عربية جاية ولا تلاقي فرش دكان دخاخني ولا خردواتي ولا سوبر ماركت ولا بتاع سمك ومافيش أي اعتبار ان الشارع بتاع كل الناس ولازم نحافظ عليه.
هو معقول الولد يعاكس البنت صباحا ومساء وكأنه دواء ومش عامل حساب ان كانت جارته او قريبته ويمكن كمان تكون اخته مافيش أدب ولا تربية.
هو معقول الست الجميلة الشيك تنظف شقتها وترمي الزبالة والهدوم القديمة والأكل البايت أمام الشقة او أمام البيت او في نص الشارع.. هو المفروض لما تنظف بيتها يبقي خلاص بقت نظيفة ومش مهم باقي الناس او الشوارع او البيوت.
صحيح احنا في بلد اللا معقوليات وأصبح كل شيء مش معقول، لكن لو رجعنا لربنا ورجعنا لدينا يصبح كل شيء معقول.
