مستشارك القانوني

١ – العقد مش حيكون باطل لو مافيش شهود ماضين عليه المهم توقيع الشخص اللي هيبعلك مش الشهود.

٢ – العقد لازم يتكتب فيه تاريخ ماينفعش يكون فاضي وحضرتك تقول لي نبقى نكتب التاريخ براحتنا.

٣ – مافيش حاجه اسمها خالص الثمن حضرتك بتكتب فى العقد أن تمن الشيء المبيع كذا وتم سداد كامل الثمن بمجلس العقد ماينفعش تقول لي أكتب خالص الثمن حضرتك مش بتشتري من كارفور ده عقد وله بنود وشروط.

٤ – ياريت حضرتك لو مش حنتقل عليك سواء بائع أو مشترى تمضي على كل ورقة ياريت ماتستسهلش وتكسل.

٥ – قولنا مليون مرة فيه فرق بين صحة التوقيع والتسجيل ومش كل العقود ينفع تتسجل فى الشهر العقاري ومش معنى أن العقد عليه ختم صحة توقيع يبقى اتسجل.

٦ – مافيش حاجه اسمها تنازل على ظهر العقد ويبقى كده اشتريت … اشتريت يعني أعمل عقد بيع وشراء.

٧ – ياريت لما حضرتك تشترى شقة أو تأجر تاخد آخر إيصالات مياه وكهرباء وغاز علشان لو المشترى باعلك مش حتشوف وشه تاني وغصب عنك حتدفعهم.

٨ – صحة التوقيع مهمه وبتثبت تاريخ البيع وتوقيع البائع والمشترى ماتعملش ناصح وتقول مالهاش لازمه علشان ماترجعش تعيط بعد كده وعلى فكره ينفع المشترى يرفع صحة توقيع على البائع وكمان ينفع البائع يرفع صحة توقيع على المشترى مافيهاش حاجه كل واحد يضمن حقه.

٩ – لو حضرتك اشتريت شقة تمليك ومالكش حصة فى الأرض والبيت وقع كده حضرتك مالكش أي حاجه يعنى حضرتك اشتريت حيطان بس.

١٠ – لو اشتريت شقه من واحد والشخص ده اتوفى بعد مابعلك من حقك ترفع صحة توقيع على ورثته عادي.

١١ – عقد الإيجار ممكن يتعمل عليه صحة توقيع لو مدة الإيجار أكتر من ٩ سنوات ولو أقل من كده يبقى إثبات تاريخ.

١٢ – ياريت قبل ماتشترى شقه تسأل هل صدرلها قرار تمكين ولا لا علشان لو زوجة البائع كانت عامله قرار تمكين للشقه قبل مايبعها يبقى عليه العوض ومنه العوض.

١٣ – ياريت لما تشترى شقه ويكون عليها أقساط تعمل العقد من ٣ نسخ البائع ياخد نسخه والمشترى ياخد نسختين علشان لما حضرتك ترفع صحة توقيع للعقد المحكمة لازم يكون قدامها أصل العقد وطبعا المحامى مش حيقدر يسحب الأصل غير لما القضية تخلص …

١٤ – على فكره عادى جدا أنك ترفع دعوى صحة توقيع على عقد ابتدائى أو عقد لسه عليه أقساط.
..

آخر نصيحة وأهم نصيحة لازم يكون معاك أو معاكي محامي فاهم للاطلاع على الأوراق والتأكد من صحتها ثم صياغة بنود العقد بما يضمن كافة حقوقك..

اوعي تستخسر الاتعاب اللي هيخدها المحامي علشان دا أمان ليك وهيوفر عليك مشاكل كتير ممكن تحصل لا قدرالله.