قوية
بقلم ياسمين زايد
فى وقفة ليا مع نفسى
لاقيتنى مفيش فى عينى دموع
ولما ضغطت على جرحى
لاقيتنى دفنته بالموضوع
لاقيتنى الجرح موجعنيش
وقلبى لاقيته مش بيئن
وروحى ثابته ويايا
على مبدأ ومش بتحن
دى صورة الاصل للمجنى
تبانلك من بعيد جانى
ولما تبص فى اصولها
تشوف جواها بيعانى
دموع رفضت تكون برا
لكن جوا بتنزف دم
وجرح ملوش أثر يذكر
لكنه فى روحها مش بيلم
وحتى تبان فى ضحكتها
قوية وثابتة على المبدأ
لكن فى الأصل على أذية
فأضعف حد كان يبدأ
فلما تشوفنى من برا
بلاش تنبش ورا المستور
فى حاجات فى العتمة محمية
وحاجات متعيش لو فى النور
