سمر_إسماعيل
ساعات الشعر بيكون أزمة !!
مفيش أصعب من الكلمة !!
مفيش أسهل من الدمعة !!
مفيش أبشع من الوحدة !!
من التوهة .. من الغربة ..
من الحبسة .. من الخنقة ..
فى براح روحك !!!
من الكتمة .. من القفلة ..
على مواجعك و جروحك ..
من القسوة ف قلوب الناس ..
من الآيد ف روحه شموع .. علشان تتداس !!
من الوطن منهوب .. بدون حراس !!
من المكروب لما يكون شفاف .. أكنه أزاز !!
من الكبير لما يمشى وحيد .. بدون عكاز !!
من السُكنة فى حضن الخوف !!
من الضبابية والعميان ..
فى عز الشوف !!
ولا أقوى من الطيبة ..
ومن الإحسان ومن المعروف ..
ولا من نصرة المظلوم ..
ولا من ظلمة المنصوف ..
ولا من أنى مصلوبة بتألم …
وأنت منى .. وبعيد عنى ..
ف وسط الألم والضعف ..
من بواخة كلمة أستنى !!!
بتوحشنى .. كل أيامنا وأحلامنا ..
كل الحب اللى كان متدارى فى كلامنا ..
قلوبنا ، وشوشنا وبرآتها ..
لما كنا .. زمان !!!
معانى الفرحة واللهفة ..
قبل ما نعرف يعنى ايه هجران ؟!!!
جريان الحب فينا فى نبع نيل مليان ..
بتوحشنى .. حاجات بخسرها من نفسى ..
بتوحشنى .. يا أكتر قلب بطيبتى كان محسسنى ..
طبطبة عيونك الدافية الدامعة على وجعى تواسينى ..
صورتك الحلوة اللى راشقة ف قلبى وكل تكوينى ..
بتوجعنى .. وقوف جروح الروح فى صفى !!!
كونك مش قابل ولا سامع ولا عايز أسفى !!!
كونك بتعذبنى ، بضحكى ، هزارى وبسخفى !!!
كونك المتعالى عن ذكرى وعن وصفى !!!
والأقوى دايماً من حدود ضعفى !!!
سامح نفسك .. وسامحنى ..
حبى ليك أرحم من أنه يكسرنى ..
تعالى نورنى ونور بى
#سمر_إسماعيل
#عشق_لا_ينتهى
