كتبت /ليلى شتا
منقول مع الدكتور جمال شعبان
عشان أنت دلوقتي مسؤول عن نفسك وأهلك
من دلوقتي أعتبر كل إنسان بتتعامل معاه إنه مصاب بالڤيروس إلي أن يثبت العكس :
وأحفظ العشرين قاعدة لإستعادة حياتك الطبيعية مع كورونا بعد فك الحظر ؛
١-ما تنزلش إلا للضرورة القصوي
يعني أعتبر نفسك لسه محظور نزولك من البيت نهائيا إلا للضرورة القصوى وخصوصا مرضى السكر والضغط والقلب والسمنة والأمراض المزمنة
٢- لكن لو عندك شغل أو مشوار مهم أوي أوي أوي
وأنت نازل بقي للضرورة القصوي متنساش ماسكك في وشك
وكحولك في إيدك
واللي يقولك اديني اديله حبة من بعيد ينوبك ثواب
٣- مش هنحضن مش هنبوس
و مش هنسلم على حد وخصوصا صحابك القدام وقرايبك ودا هيستمر لمدة شهور لسه
٤-مش هتاكل من الشارع نهائيا إلا لو مكان مضمون أوي أوي أوي
وفي الشغل كل واحد له أدواته الخاصة بالأكل والشرب ومفيش الفطار الجماعي بتاع الصبح دا كان زمان دلوقتي بح خلاص
٥-هنحافظ علي المسافات بينا متر ونص علي الأقل والكلام
دا بيطبق علي أي مكان أنت فيه خارج البيت سواء سوبر ماركت او محلات تجارية او مصلحة حكومية
٦-هنستعمل مناديل للعطس والكحة وزي ما تعودنا نتخلص منهم بطريقه آمنة
٧-ونعقم إيدينا كويس بالكحول .. وأنت خارج البيت دايما ولو قدرنا نغسل إيدينا بالميه والصابون .. يكون أفضل طبعا لمده ٢٠ ثانية
وطبعا الكمامة قبل لما نخرج من البيت نكون لابسينها وان أمكن معانا أكتر من واحدة عشان لو ابتلت تتغير في الحال و نلبسها في الاماكن العامة والمواصلات وأماكن الازدحام
٨-وطبعا خلاص النوادي حتفتح و التمارين حتبتدي و الأفضل إنك حالياً ما تروحش نادي ولا سينما ولا خروجات ولا شواطيء نهائيا ولا أي حاجة فيها تجمع نهائيا الا في الضرورة القصوي
٩-ولو بتتمرن لوحدك أو مع أفراد قليلة جدا لازم تباعد بينكم واضح
١٠-وممنوع لبس الماسك خلال التمرين الفردي نهائيا وخلال ممارسة أي رياضة بشكل عام زي الجري وركوب العجل
١١-طبعا الكافيهات والمطاعم فتحت
مش هناكل أو نشرب فيها نهائيا
ولو في حد هيرمي نفسه في البحر وعايز يأكل في المطاعم وينزل كافيهات لازم ياخد باله ويستخدم أدوات ذات الاستخدام الواحد فقط من أطباق وأكواب Disposable
١٢-ومفيش شيشة لأنها أكثر سبب لإنتشار العدوي طبقا لمنظمة الصحة
١٤-لو ركبت مواصلات عامة أو تاكسي ولقيت السواق مش لابس كمامة أطلب منه إنه يلبسها ولو ما رضيش إنزل وأركب غيرها ساعتها هيخاف علي أكل عيشه وهتجبره انه يلبسها وده امان ليك وله
١٥- طيب لو عايز ترمي نفسك في البحر وتاكل جوه المطعم أو كافيه لازم ناخد بالنا من وسائل التعقيم في المطعم والعاملين لازم يكونوا لابسين كمامات أو أطلب منهم يلبسوا لو حد نسى الناس كلها إن شا الله تكون ملتزمة وخايفة علي نفسها
١٦- لما نرجع بيتنا بالسلامة أتعود تلمس مقابض الأبواب و زراير الأسانسير بكوعك مش بصوابعك أوإستخدم مناديل الورق وخلي منها كثير في جيبك عند العطس بسبب تغيير الجو والتراب .
١٧-نقلع الشوز علي الباب وندخل نغسل إيدينا كويس بالميه والصابون ولو خدنا شاور يكون أفضل .
١٨-وطول ما إحنا برا البيت نحاول علي قد ما نقدر إيدينا ما نلمسش وشنا خالص ونعقم إيدينا كويس طول ما إحنا برا وخلي عندك شعور دائما ان الڤيروس في إيديك ولازم تغسل إيديك على طول
١٩-وطبعا كلنا بنحب أكل الدليڤري
ناخد بالنا كويس جدا وإحنا بنطلب من مكان موثوق فيه أولًا وإحنا بنحاسب نلبس ماسك وعلي بعد متر ونص وندخل الأكل ميكروويڤ
أو فرن كم دقيقة وناكل بعد كدا بالهنا والشفا
ونخلي بالنا كويس جدا إثناء التعاملات المادية وتعقيم الفلوس الإيدين جيدا بعد اي تعامل مادي
٢٠- لو هتروح عيادة أو مركز طبي أو مستشفى لازم تكون عند الضرورة فقط وناخد بالنا من التباعد والتعقيم والماسكات وعقم الكراسي قبل وبعد جلوسك على كراسي الإنتظار وتروح للدكتور لوحدك أو معاك مرافق واحد فقط .
وأخيرا خد بالك وركز على مفاتيح المناعة الطبيعية
الأكل الصحي وشرب السوائل
النوم الكافي
وممارسه الرياضة
وأهم حاجة الحالة النفسية الجيدة
والثقة وحسن الظن بالله
يقيننا بإن الله لن يضيعنا
حفظ الله مصر
حفظ الله الجميع
