. { الزَفَّه }
صوره جنائزيّه
.السيد فريج
___________
خَيِّ ابراهيم
شُفت دينا
ايش بيها دينا
يام دينا
ماشفتها
قمر مِنوَّر
الله عليكِ خَيِّتى
فرحانه بيها
ابن خيِّ وبنت عمري
النهارده حازفُّه ليها
عمي ابراهيم
ايش ياحليم
فين العريس
لِسّاه مجاش !!
اسأل عويس
أكِنُّه عَوَّق
هو اللى راح يستقبله
عمي ابراهيم
مالك ياوَلدي
دوَشتِنا
الناس بتسأل
وعروسته قلقانه عليه
زمانته جاي
عمِّي ابراهيم
العمده طه
ماله ياوَلدي
رايدك حِداه
قُولُّه يِشَرِّفْ
البيه معاه
قُولُّه يشرِّف
هو وضيوفه كمان
عمي ابراهيم
ايش ياحليم
جايِّين ورايّ
يا مرحبا
عمِّي ابراهيم
ايش يااسماعين
البيه حسين
أهلاً يابيه شرفتنا
ويّاي رساله
من مين يابيه
قلَّقتنا
من راجل بطل
يبقى اتقتل
مينا اتقتل
بقالي ساعتين
قلبي يقولٍّلي إنُّه اتقتل
مين اللي قال إنُّه اتقتل
مينا شهيد
دا النهارده زفته
لساه مجاش
من غُربته
عمِّي ابراهيم
مينا جاي
انا قلت أحضر زفته
مينا في السما
حُور العيون في صُحبته
و عروسته دينا !
دا النهارده زفته
وفي لحظه واحده
دار الخبر
لفّ البلد
والحزن غطَّى فرحتُه
عروسته حاضنه نفسها
والدموع بدل الشموع
لفَّه بيها قلبها
عسكر ومدفع
وزمايله شايله جتته
عروسته تصرخ
والضحكه ماليَه وشِّها
عمِّى ابراهيم
فين جتته
عريسى مينا …
فين جتته
ماشي يا دينا
دا النهارده زفتُّه
هاتلي مينا
أحبّ يَدَّكْ آخدُه فى حضني
عشان أبوسه فى زفتُّه
البيه يقول بلاش يادينا
دا ابني مينا
عمِّي ابراهيم
حاضر يادينا
وراس أبونا
مايزف مينا غيرك يادينا
فين جتته !!
خلاص يابيه
أحب يَدَّك
موعوده لِيـه
يا خلق هوُه
فين جتته !!
عمِي ابراهيم
بسّ العَلَم …
فين جتته !!
دي بس راسُه
وحته من صدره وبدلته
فين جتته !!
آه يامينا
يا عمري كله وفرحتي
في حُضن دينا
وفي صمت يقتل كل فرحه
فى سكته
صرخ اسماعين
فين الكلاب والمجرمين
قتلوك يامينا
عمِّي ابراهيم
ايـه يامينا …
أكِنُّه قال بيحدته
مع السلامه
يابن السنين
لا دمع نافع
ولا حنيــن
ناس بتبكي
وناس تغنِّي
اللهُ أكبر اللهُ أكبر
ودمع دينا غطّى العلم
دا فرح ليها
والَّا الألم
وفي المدافن
عمِّي ابراهيم
أحب يَدَّكْ
أدخل معاه
حاكشف شويِّه
وافرح شويِّه
نفسي اشوفه في طلِّته
واحب راسه
يا خلق هوه دى زفته
خلاص يادينا
خِلص الفرح
إديله مينا
يرتاح في نومته ورقدته
نسوان تزغرط
دينا … وطرحه
ودموع وصرخه
قايمه تغطِّى وشِّها
والناس بتصرخ
اللهُ أكبر
أللهُ أكبر
يالَّه بينا
حنروح لِسِينا
نجيب بايدنا حقِّنا
دينا بتصرخ
قَفلوا عليه
عاوزينّا نرجع كُلِّنا
خلاص خِلصتي يازفتي
ومينا راح مع فرحتي
آه ياروحي وكلّ عمري
وضحكتي
الناس بتجري
ويَّا العساكر
رايحين لِسِينا
أللهُ أكبر
ودِينا ويَّا القبر قاعده
ويَّا أبوه
وأم مينا
وأمها …
ماهم في زفَّه
موعوده لِيـه
بنتي دينا
حبيبي مينا
وادى زفتُّه !!