بقلم : طلعت حلمى عامر
كبر كدبه انك حبيت
لما قابلتك تُهت وجيت
بس يا سيدى
يومها الدنيا فى عينى احلوت
ومشيت اجرى واقول وأجوِّد
عن حركاتك
وابتساماتك
والكلمه بتطلع وتـْ حوِّد
فى اتجاهاتك
رغم آهاتك
بس لقيت قلبك كان ميت
يومها حايلته
وبصوت مبحوح روحت سالته
قلبك مات من كتر القسوه؟
ولا الناس كلها ولا تسوى؟
رد وقال لى القلب جريح
كان عامل من نفسه ضريح
رغم الحب المولود فيه
مات والدفن بدون تصريح
عاش طول عمره يحب الكل
ولا فى حد عليه بـِ يُطل
حَب وحبه طلع أكذوبه
حتى مافيش لاصديق ولا خِل
روحت سألته العيب كان فين؟
رد وقال لى العيب له روحين
روح من عندى وروح من عنده
يعنى العيب مقسوم لإثنين
عيبى الطيبه كانت مسكانى
والمصلحه كات عيب الثانى
هو عرفنى عشان مصلحته
وانا ضيعت حياتى لراحته
والأخر قال عنى الجانى!
بس الطيبه دى حاجه عظيمه
والطيب انسان لــه قيـمــه
رد وقالى الطيبه جريمه
عمر حياته ماتبقى كريمه
قلب بيحرق نفسه لغيره
نفسه فـ مره يحس بخيره
لكن الكل بيسرق خيره
وبيعطيه من باب الاحسان
قلب وشايل كل الهم
ولا فى حد فى يوم يهتم
كل الهم عليه مفروض
والكل بياخد ويذِم
حبك ضايع مهما سعيت
مهما سافرت وروحت وجيت
اعرف ان الحب دا كدبه
واكبر كدبه انك حبيـت