دكتورة سحر زغلول
مضطرب لكنه مميز وسعيد ولا يمكن فهمه …. صفات لا تعرفها عن الشخص النرجسي
المقال دة لكل واحدة ارتبطت و حست بعد ما كانت طايرة في السحاب انها نزلت لسابع ارض ، حست انها بتتعامل مع شخصية 2*1 الشخص الطيب الجميل و الشخص العصبي القاسي الخاين الكذاب الي معرفش معني الحب و لا عمره هيعرفه
النرجسية اضطراب في الشخصية ويتميز بالغرور والتعالي وعشق الذات ومحاولة الكسب ولو علي حساب الآخرين
كيف يصطادك النرجسي
اولا بيدرس الشخصية كويس جدا جدا ، مبيختارش اي ضحية لا بيختار حد مميز وناجح عشان يفرض سيطرته عليكي…
كمان في حاجة مهمة النرجسي بيراقبك كويس جدا و بيعرف ايه المشكلة الي في حياتك و بيدخلك منها
عندك نقص اهتمام ، حب ، حنان ،او ازمة معينة ..وقتها هتلاقيه جمبك وهيحاول يعطيكي كل حاجه انتي محتاجاها في الوقت دا عشان يصطادك اسرع .
النرجسي باله طويل يعني هيحطلك خطت كتير ممكن توصل لسنين …الوقت عنده مش مهم المهم ان يوصل لهدفه وبسس
من سياسات النرجسي سياسة قلب الترابيزة ودي سياسة بيستخدمها دايما :
تروحي عندك مشكلة فجأة المشكلة تتقلب و فجأة تتحولي من وضع الهجوم لوضع الدفاع لانه دايما علي حق
النرجسي ملول جدا بمعني انه مش هيطول معاكي في علاقة بيفضل يستنذفك و دة ليه اشكال كتيرة اوي اول ما ييسأس منك و تبقي كارت خسران هيمشي و يسيبك ، يسيبك هنا مش انه هيسيبك و يشوف غيرك لا المفاجآة ليكي ان في الوقت الي هو بيلعب عليكي و بيقنعك ان مفيش غيرك هو معاة غيرك كتير اوي ممكن توصل ل 5 و 6 علاقات في نفس الوقت قديم و جديد ده مبيحبش يخسر علاقة كان معاها.
بيستنزف مشاعرك و دة بطريقتين اهتمام ايجابي و اهتمام سلبي
1_ الاهتمام الايجابي تديله حب و تعاطف و حنان …
2_ الاهتمام السلبي انه بيتغذي علي مشاعرك من خلال العصبية و الزعل ….
الاستنزاف المادي و الجنسي و دول معروفين و في الاغلب الشخصية النرجسية بيبقا هدفها من الشخصية هدف جنسي و بس هتقوليلي حب و دة حبني و انا شوفت دة هقولك لا دة مبيحبش ، دة مبيعرفش يحب غير نفسه بس ، ممكن يلعب عليكي باسم الحب لحد ما يوصل لهدفه .
عندك حاجة كمان مهمة جدا
لو لاحظتي علاقاتك اللي موجوده في حياتك من اول ما عرفتيه هتلاقيها بتقل مش بتزيد ، هدف النرجسي انه يبعدك عن كل الناس اهل ، اصحاب جيران … اي حد ممكن يسندك ويفضل جمبك
تبقي لوحدك و دة في الغالب عشان محدش يقدر يكتشفه و يدعمك و يخليكي تبعدي عنه
النرجسي عنده حيلة معروفة جدا بيديكي اهتمام كتير و كبييير اوي لحد ما يضمنك و يضمن انك دخلتي التراك بتاعه و خلاص مش هتعرفي تخرجي منه وقتها بيلعب معاكي لعب كتيرة اوي يكسب بيها اهتمام سلبي زي معلش انا محتاج وقت افكر فيه ، فجأة يبعد متعرفيش توصليله ، يأدبك بغيابه اسبوع و اثنين و شهر و اثنين و غيرها من الحيل المعروفة جدا عنه
دوره انه بيلففك في التراك بتاعه يستنزفك و يستنزف مشاعرك اول ما بيلاقيكي خلاص هتمشي يرجع و يحسسك ان خلاص اتغير و يديكي حب كبير اوي عشان تفضلي بعدها يعمل نفس الحيلة تاني بس بطريقة مختلفة وتفضلي تلفي التراك بتاعه لحد ما تبقي خلاص كارت خسران بالنسباله بيسيبك وقتها لما يبقا خلاص ضامن ضحية جديدة و عارف انه خلاص استنزفك و مش هياخد اكتر من الي اخده وقتها بيسيبك بس خدي بالك بيسيبك بس مبيسبش مراقبتك النرجسي بيراقب كويس جدا بيفرح لما يلاقي كل كلامك حزن ووجع و جرح بيحس انه نجح في مهمته اول وجع ليه لما يلاقيكي بدأتي تفوقي و تتبسطي و تعيشي حياتك وقتها بيرجع تاني لانه بيبقا عارف انك تعافيتي منه بيرجع يخليكي تلفي ف نفس التراك تاني
طب لو انتي خلاص اتجوزتيه ومش هتعرفي تهربي عندك اكتر من حاجه ممكن تعمليها
1)) التجاهل :_
النرجسي مرضه انه يحس انه متجاهل و ملوش اي تأثير ، وجوده زي عدمه
متعتمديش عليه ف اي حاجة لانه شخص لا يعتمد عليه تاخدي كل قراراتك لوحدك و تقضي كل اغراضك بعيد عنه
متحسسهوش انه بيأثر فيكي مثلا في زيارة عائلية و بدأ يقلل منك و ينتقدك خدي الموضوع بهزار و تجاوزية و متوصلهوش انه ضايقك
النرجسي اتعرض لمشاكل في صغره كانت بذرة كبرت معاة لحد ما حولته للشخص دة
دايما كلامه عن نفسه هيبقا انه كان حد ناجح جدا و شاطر و متفوق علي الرغم ان كل حاجة بتقول غير كدة
و دة ليه لان الشخصية بطبيعتها كذابة ، خاينة ، متلاعبة ، بتستمتع بأذي الاخرين و التلاعب عليها
نصيحتي الاخيرة ليكي اهربييييييييي و متحاوليش تدخلي حرب معاة لان دة نفسه طويل جدا
الشخص دة هيحولك مريضة نفسية شبهه هو مبيواجهش نفسه بمرضه النفسي ف بيرميه عليكي انتي
كل الي بيسعي ليه انه يدمرك و بس
دايما بيهينك و بيجرحك قدام كل الناس
هتقوليلي هيتغير هقولك كل الدراسات اثبتت ان الشخصية النرجسية مبتتغيرش و مبتتقبلش فكرة انها مريضة نفسية و لو فكرتي تعرفيه دة هتقابلي منه انفجار مش هتعرفي تواجهيه
ابعدي البعد مش سهل بس دة الحل الوحيد ، النرجسي بيحولك لآلة تشوفي الغلط و تسكتي خوفك و رعبك كله من الحياة انه يسيبك ، تكتشفي كذب و تكملي ، خيانة و تكملي كل دة عشان حاجة مزيفة هو ميعرفهاش اسمها الحب
انقذي نفسك و خدي الخطوة و ابعدي انتي مش مسأولة عن نفسك بس لا انتي بتختاري حياة اولادك ، اطفال ملهومش ذنب انهم يتحولو لنرجسيين او ضحايا لنرجسيين
ملحوظة : كل شخص نرجسي هيقرأ المقال هيلعن كل الاوغاد النرجسيين و عمره ما هيقول علي نفسه نرجسي
