نقلها لكم ناصف ناصف
بمناسبة الاحتفال بانتصارات اكتوبر
كلمات / محمود جنيدى
أما اقف وارفع راسى فوق ..
واقول أنا مصرى ..
يعنى انا ابن مصر ..
يعنى انا ابن الأصالة والتاريخ والحضارة ..
وابن الرجولة والشهامة والجسارة ..
يعنى انا أصل الكبارة ..
انا النيل والهرم وانا الأزهر الشّريف ..
انا اللى الليل فى يلدى عمره ماكان مخيف ..
الأمان اللى تحسّه حتى لو تبات ع الرصيف
والمآذن اما ترفع النداء فى لحظة واحدة :
الله أكبر ..
وأجراس الكنايس ..
تعلن عن عقيدة تانية ف حضن مصر ..
و تشوف جرجس بيوصل الحاج اسماعيل ..
عشان يلحق صلاة العصر ..
وام عبدالسلام جاية تهنى أم مينا ..
عشان خطوبة بنتها ..
أيوة هى دى مصر اللى تحضن الغريب
كانه ابنها ..
ومتسألكش إنت مسلم أو مسيحى ..
عشان مش ده المهم ..
المهم تبقى هى عندك شئ مهم ..
نبقى كلنا متكاتفين شعبا وجيشا ..
واما يسألوك أنت إيه
تقول لهم مصرى مش إيجيبشان ..
أنا اللى على أرض بلدى ..
ربنا كلّم سيدنا موسى بدون حجاب ..
وتجلّى ربّه للجبل جعله دكّاء ..
ويوسف الصّدّيق والمسيح عيسى بن مريم ..
إحنا اللى من حضارتنا كل العالم قد تعلّم ..
ومن آل البيت عندنا نفيسة العلم وزينب ..
وسبط الحبيب النبى سيدنا الإمام الحسين ..
مصر أبيّة لا تنحنى إلا لربّ العالمين ..
واما يسألوك عن سبعة وستين
قول وماله فيها إيه ..
عبدالناصر وقف وقال حنحارب ..
واتلمت البلد حواليه ..
وجه بعده السادات قال متخافوش ..
واستعداد ليوم حييجى حتما واستنزاف ..
وفجأة تسريح للجيوش ..
ازاى ؟؟ طب ليه وانتوا محاربتوش .؟؟.
الله يرحمك ياسادات يابو دماغ توزن بلاد ..
واما جه يوم ربك كان محدده ..
كان هتاف الأرض والسما بتردده ..
الله أكبر ..
الله أكبر من بارليف ومن مليون عدو ..
الله أكبر الأبطال أهم بيعبروا ..
كتبوا تاريخ فى التاريخ للى جاى بعدهم ..
مصر متنكسرش ، ..
متنحنيش إلاّّ بس فى الصلا ..
وان العقيدة فى القلوب متأصلة ..
وان مصر هى إحنا ..
واحنا كلنا فداها ..
************
6أكتوبر2019
