نور

إبراهيم منصور بدر 
{1}.
وابتسامه..
قبل متروح بالسلامه..
اوعى ترجع ليجافوك..
إسأل اللى يفوت عليك..
مين مغمّض للى منّه؟..
مين ف حلمه ،،
ومين ف علمه
يستحق فيوم يآمنه عالوجع؟.
انسي واسمع واقتنع..
النّور ف دمعات السطور..
بيغمى نص الليل ،،
وآخر تلت فيه!.
والباقى غمضه
ف حلم مبتحلمش بيه!.
…………………………………
{2}..
إفتكرها..
وابقى ف الأحلام شاغلها..
قبل روحك متناديلها؟..
كنت بتدُوُر عالحكاوى..
واللى واحشاك منّها..
تشتكيها وتشتكيلها!..
احساس مالهوش ف التفاسير..
ولا لاقادر يثبت عالأرض..
ولا قادر ف سماها يطير..
بينى وبينها..
عين مكسوره..
ونار بردانه..
ف حضن النور!.
…………………………………
{3}…
حب تانى؟..
لأ مفيش!..
الحب..
من مهد الأزل..
قابض..
على نبض الحياه!..
حتّى اللى تاه..
عن سكّته..
عايش معاه!..
نور الأثير..
ف الروح ودع..
بيوشوشه الشوق ف المنام!..
مهما المرار..
غطّى النهار..
الليل مُسكِّن للآلآم؟.
…………………………….
{4}….
فاتت ساعات ..
ف سنين ..
تشبه لسان البرق!..
أحمال على مساكين..
متعودين عالحرق!.
بين العيون إشارات..
بترقّق العبارات..
وترمم اللى انشق
ف سنين أكلها الهجر!..
بين الشفق والفجر..
وقت الحنين لحياه
فاتها الأوان ف العمر!.
………………………….
{5}…..
كلّها أوقات..
فراغات مبين فراغات.
وساعات تدق العمر،،
وتفارقه تحت الأرض!..
طولِك مساوى العرض،،
ف البسمه والدمعه..
طول الألم لو فرض..
إتوضّى من وجعه!..
متصدّقيش الحلم..
متبرريش العلم..
أيَّامنا لحم ودّم..
وليالى مقطوعه!.
مفرود بساط الروح..
فوق نسمه موجوعه!.