………….(كلام)………

إبراهيم منصور بدر

…………………………..
مستنى ايه اكتر..
حلمك هيتفّسر،،
وهتنسي كل المر..
تعرف..
مش كده خالص..
إعكس ..
كل سطور الصفحه..
تعرف..
ان الصورة الواضحة..
ساترة كتير ..
استنيت،،
ومشيت وحديك..
بيهزّك ..
إحساس مجروح..
تيجى..تروح
ترجع لمكانك جوّة الضلمه!.
صعبه حياتك،،
وانت مضيّق دنياك
على أد طموح احساسك..
قافل على ذاتك
واهب عمرك لمشاعر
بتنام وتقوم ترسمها
على انسام الاحساس!؟.
هات ..
شويّة من اللى فات،،
واسدل الليل ذكريات..
بص ..
للصورة اللى فاتت،،
بص..
للصورة الاخيره،،
وافصل الفرق ف ملامحك..
حِس تأثير السنين..
واقف على بدّال العمر..
ومصمم تفضل مألوف ..
جوّاك ..
خوف عاشق ملهوف..
احضان..
العالم مفتوحه ،،
وانت ..
على البدّال ف الضل!.
مين اللى بيشكِّل..
عيونك عالصفا ؟..
إمتى اختفى..
نورك ياعشق؟..
فات اللى مات،،
وحاجات ف روحك
علِّمت..
قلبك يفضفض للفراغ..
دابت ..
تقاطيع الحنان ف الغدر،،
ومفيش..
لفجر الكون مكان
بين النيام،،
ولا للضحى..
عصفور يغرّد..
جرّب ..
ولا تسأل مجرّب ..
قرّب..
على نفسك أوى ،،
واستوى ..
على خط سير..
بين الجوارح والضمير ..
واكتب السطر الاخير !.