جراح العشق
بقلم سمير احمد القط
فى كل شارع
و كل حارة وفى كل بيت
بلمح عيونك والمس نهار الشوق
فى كل شجرة وكل غيط
بشرب كؤوس الحب
وعمرى عمري ما ارتويت
بعشق سهادى فى ليلك انت
مهما عنك ابعد او مشيت
بعشق ادان الفجر
بلعن ساعات الهجر
ورغم كل المستحيل
برفض شطوط الغربه
والجسد العليل
احن ليكى وياما اشتهيت
وبين الاسية والحنين
اتمرمغ فى حضنك
اشتكى لك
واسب فيكى واشتمك
لكن كيف اخون حبى
وعشقى ليك
مهما كتمته او دريت
مهما خطوط الجرح
بتعلم فى جسمى
مهما حروف الفرح
ناسيانى باسمى
انا العاشق انا الهايم
فى حضن حضنك
فوق شفايفى غنوتك
وفى الوريد سكتك
وعرش ملكك جوه قلبى
مهما جوعت او عانيت
بفرد ايدين الحب
لضوء نهارك
بعشق عيدان الصبر
واتحامى بسمارك
واقول يامصر انت حبى
وحبى ليك هو سرى
مهما قولت او داريت
